75 min manatlıq dələduzluqda təqsirləndirilən Nizami Hacıyevin cinayət işi üzrə məhkəmə araşdırmasına başlanılıb.
İlkinxeber.az informasiya agentliyi məlumat verir ki, işə Bakı Ağır Cinayətlər Məhkəməsində hakim Kamil Əliyevin sədrliyi ilə baxılır.
Məhkəmə iclasında təqsirləndirilənin vəkili Sənan Mehdiyev vəsatətlə çıxış edərək, müvəkkilinin 67 yaşının nəzərə alınmasını xahiş edib və onun barəsində seçilmiş həbs qətimkan tədbirinin daha yüngül tədbirlə əvəz olunmasını istəyib. Prokuror isə vəsatətin əsassız olduğunu bildirərək təmin edilməməsini tələb edib.
Müşavirədən sonra məhkəmə vəsatəti təmin etməyib.
Zərərçəkən şəxs ifadəsində bildirib ki, iki yük maşını kibrit gətirilməsi məqsədilə Nizami Hacıyevə 75 min manat pul verib. Onun sözlərinə görə, təqsirləndirilən şəxs müxtəlif bəhanələrlə öhdəliyini yerinə yetirməyib, pul tələb edildikdə isə şantaj yoluna əl atıb.
Təqsirləndirilən isə ittihamları qəbul etməyərək, pulu qarşılığında malları zərərçəkənə təhvil verdiyini iddia edib.
Hakim təqsirləndirilənin ifadəsini qeyri-səmimi hesab edərək onu düzgün və səmimi ifadə verməyə çağırıb.
Növbəti məhkəmə iclası avqustun 7-nə təyin olunub.
Qeyd edək ki, Nizami Hacıyevə Cinayət Məcəlləsinin 178.3.2-ci maddəsi (külli miqdarda dələduzluq) ilə ittiham irəli sürülüb. Əvvəlcə onun barəsində həbs olmayan qətimkan tədbiri seçilsə də, sonradan zərərçəkənin vəsatəti əsasında bu qərar dəyişdirilərək həbs qətimkan tədbiri ilə əvəz olunub və o, məhkəmə zalında həbs edilib.
