Almaniyada pensiya yaşı yenidən gündəmə gəldi
Almaniya hökuməti pensiya sisteminin gələcəyini təmin etmək məqsədilə yeni islahat paketi üzərində işləyir. İLKİNxeber.az informasiya agentliyi xarici mediaya istinadən xəbər verir ki, kansler Fridrix Merts Bundestaqda çıxışı zamanı pensiya sistemində dəyişiklikləri nəzərdə tutan qanun layihəsinin bu ilin sonunadək parlamentdə qəbul edilməsinin planlaşdırıldığını bildirib.
Onun sözlərinə görə, hazırlanan islahat paketi payız sessiyasında müzakirəyə çıxarıla və ilin sonuna qədər təsdiqlənə bilər.
Hökumət tərəfindən yaradılan ekspert komissiyası pensiya sisteminin uzunmüddətli maliyyə dayanıqlığını qorumaq üçün bir sıra təkliflər hazırlayıb. Təkliflər sırasında İsveç modelinə uyğun dövlət dəstəkli pensiya fondunun yaradılması, eləcə də pensiya yaşının orta ömür uzunluğuna uyğun mərhələli şəkildə artırılması yer alır.
Komissiyanın hesabatında qeyd olunur ki, 2032-ci ildən başlayaraq pensiya yaşı hər on ildən bir təxminən altı ay artırılacaq. Mövcud hesablamalara görə, bu proses nəticəsində pensiya yaşının 70 həddinə çatması yalnız 2092-ci ildən sonra mümkün olacaq.
Fridrix Merts bildirib ki, İkinci Dünya müharibəsindən sonra doğulan və “baby boomer” adlandırılan nəslin kütləvi şəkildə əmək bazarını tərk etməsi pensiya fondları üzərində ciddi maliyyə yükü yaradır. O vurğulayıb ki, bu istiqamətdə addımların daha əvvəl atılması vacib idi.
Hazırlanan paketdə məcburi pensiya yığım sisteminin gücləndirilməsi və kapital bazarına əsaslanan yeni investisiya mexanizmlərinin tətbiqi də nəzərdə tutulur.
Qeyd edək ki, Almaniya dövlət dəstəkli pensiya sistemini ilk dəfə 1889-cu ildə kansler Otto fon Bismarkın dövründə tətbiq edib. Həmin vaxt pensiya yaşı 70 olaraq müəyyənləşdirilmişdi.
Rəsmi məlumatlara əsasən, hazırda Almaniyada 65 yaşdan yuxarı insanların sayı 19 milyona yaxındır ki, bu da ölkə əhalisinin təxminən 23 faizini təşkil edir. Müqayisə üçün qeyd edək ki, 1991-ci ildə bu göstərici 15 faiz səviyyəsində olub.
