İLKİNxeber.az informasiya agentliyi xəbər verir ki, Azərbaycanın xarici işlər naziri Ceyhun Bayramov ilə Pakistanın xarici işlər naziri Məhəmməd İshaq Dar arasında telefon danışığı baş tutub.
Danışıq zamanı ABŞ və İran arasında Anlaşma Memorandumu çərçivəsində əldə olunan razılaşma ətrafında geniş fikir mübadiləsi aparılıb.
Azərbaycan tərəfi Pakistanın danışıqlar prosesində oynadığı mühüm vasitəçilik rolunu yüksək qiymətləndirib. Xüsusilə Pakistanın Baş naziri Şahbaz Şərifin, baş nazirin müavini və xarici işlər naziri Məhəmməd İshaq Darın, eləcə də Müdafiə Qüvvələrinin rəhbəri feldmarşal Asim Munirin şəxsi səylərinin əldə olunan nəticədə əhəmiyyətli rol oynadığı vurğulanıb. Həmçinin, prosesə dəstək verən digər regional tərəfdaşların töhfələri də qeyd olunub.
Tərəflər bildiriblər ki, əldə olunan razılaşma regionda gərginliyin azalmasına, qarşılıqlı etimadın güclənməsinə və diplomatik həll yollarının təşviqinə müsbət təsir göstərəcək.
Nazir Ceyhun Bayramov növbəti mərhələdə daha geniş və hərtərəfli razılaşmanın əldə olunacağına ümid etdiyini ifadə edib və bunun uzunmüddətli sülh, təhlükəsizlik və sabitlik üçün mühüm əhəmiyyət daşıdığını qeyd edib.
Telefon danışığı zamanı həmçinin ikitərəfli əməkdaşlıq və regional gündəlikdə duran digər məsələlər də müzakirə olunub.
