Avropada ekstremal istilər: bir həftədə 1300-dən çox ölüm qeydə alınıb

Avropanı bürüyən ekstremal isti hava dalğası ciddi humanitar və infrastruktur problemlərinə səbəb olub.
ilkinxeber.az informasiya agentliyi məlumat verir ki, Ümumdünya Səhiyyə Təşkilatının (ÜST) baş direktoru Tedros Adanom Qebreyesusun açıqlamasına əsasən, 21 iyun 2026-cı ildən etibarən Avropada yüksək temperaturla əlaqəli 1300-dən çox vaxtından əvvəl ölüm halı qeydə alınıb.
Sosial şəbəkələrdə yayılan 20 mindən çox insanın həyatını itirməsi barədə məlumatlar isə rəsmi statistika ilə təsdiqlənmir.
Məlumata görə, isti hava dalğası xüsusilə İspaniya və İtaliyada ağır nəticələrə yol açıb. İspaniyada son günlər azı 212 nəfərin, İtaliyada isə ən azı 5 nəfərin yüksək temperaturun təsirindən öldüyü bildirilir.
Hazırda Avropada təxminən 150 milyon insan ekstremal istilər şəraitində yaşayır. Bir sıra ölkələrdə temperatur rekord həddə yüksəlib. Fransada, o cümlədən Parisdə havanın temperaturu 40 dərəcəni keçib. Bu səbəbdən 3500-dən çox məktəb bağlanıb, elektrik şəbəkələrində isə həddindən artıq yüklənmə müşahidə olunub.
ÜST əhalini, xüsusilə yaşlıları, uşaqları və xroniki xəstəlikləri olan şəxsləri günün ən isti saatlarında açıq havada uzun müddət qalmamağa, bol maye qəbul etməyə və zərurət yarandıqda tibbi yardıma müraciət etməyə çağırıb.