ABŞ və İran arasında Hörmüz boğazında gərginliyin azaldılması və dəniz nəqliyyatının bərpası ilə bağlı əldə olunduğu bildirilən ilkin razılaşma dünya enerji bazarlarında diqqətçəkən dəyişikliklərə səbəb olub.
İLKİNxeber.az xəbər verir ki, bu xəbərin ardından neft qiymətlərində kəskin eniş qeydə alınıb və göstəricilər son ayların ən aşağı səviyyəsinə yaxınlaşıb.
Beynəlxalq bazarlarda etalon hesab olunan “Brent” markalı neftin bir bareli 4,9 faiz ucuzlaşaraq 83,05 dollara enib. ABŞ xam nefti (WTI) isə 5,4 faiz dəyər itirərək 80,30 dollardan satılıb. Məlumatlara görə, son bir həftə ərzində hər iki neft növünün qiymətində təxminən 10 dollarlıq azalma müşahidə olunub.
Bildirilir ki, Vaşinqton və Tehran arasında Hörmüz boğazında hərbi risklərin azaldılması, həmçinin beynəlxalq dəniz ticarətinin bərpası istiqamətində ilkin anlaşma əldə edilib. Razılaşma çərçivəsində ABŞ tərəfindən İran limanlarına tətbiq olunan bəzi məhdudiyyətlərin yumşaldılması və boğazda gəmi hərəkətinin daha sərbəst şəkildə həyata keçirilməsi nəzərdə tutulur.
Ekspertlərin fikrincə, neftin ucuzlaşmasının əsas səbəbi bölgədə geosiyasi risklərin azalması ilə bağlı gözləntilərdir. Bununla yanaşı, analitiklər bazarda tam sabitliyin yaranması üçün Yaxın Şərqdən enerji ixracının əvvəlki həcmlərə qayıtmasının vacib olduğunu qeyd edirlər.
Mütəxəssislər vurğulayırlar ki, hazırkı qiymətlər münaqişədən əvvəlki dövrlə müqayisədə hələ də yüksək olaraq qalır və qlobal enerji bazarında qeyri müəyyənlik tam aradan qalxmayıb.
