Ukrayna Ali Radası Ruslan Kravçenkonun baş prokuror vəzifəsindən kənarlaşdırılmasını dəstəkləyib.
ilkinxeber.az informasiya agentliyi xəbər verir ki, Kravçenkonun vəzifədən azad olunması ilə bağlı qərarın lehinə 317 deputat səs verib. Qərarın əleyhinə səs verən olmayıb.
Səsvermədən əvvəl Kravçenko özünün “Telegram” kanalında deputatlara təzyiq göstərildiyini iddia edib və qanunvericiləri qərarlarını müstəqil şəkildə qəbul etməyə çağırıb.
Kravçenko 2025-ci ilin iyun ayından Ukraynanın baş prokuroru vəzifəsində çalışırdı. O, Prezident Volodimir Zelenskinin dövründə bu vəzifəyə təyin edilən dördüncü şəxs olub.
Hadisələr sentyabrın əvvəlində Ukraynanın Milli Antikorrupsiya Bürosu və İxtisaslaşdırılmış Antikorrupsiya Prokurorluğunun keçirdiyi əməliyyatla daha da gündəmə gəlib. Hüquq-mühafizə orqanları Baş Prokurorluğun struktur bölmələrindən birinin rəhbər müavininin başçılıq etdiyi cinayətkar təşkilatın fəaliyyətinin ifşa edildiyini açıqlayıb.
İstintaqın məlumatına görə, həmin təşkilat dələduzluq fəaliyyəti göstərən çağrı mərkəzlərinə himayədarlıq edib və əldə olunan vəsaitlərin leqallaşdırılması ilə məşğul olub. Əməliyyat çərçivəsində Kravçenko ilə bağlı da axtarış tədbirləri keçirilib.
Sentyabrın 7-də Kravçenko istefa ərizəsi yazdığını açıqlayıb.
Sentyabrın 14-də isə o, Ukraynadan xidməti ezamiyyətə getdiyini bildirib. Həmin gün baş prokuror NABU direktoru Semyon Krivonos və SAP rəhbəri Aleksandr Klimenkoya yaxın olduğu bildirilən şəxs barəsində ittiham aktını imzalayıb.
Ukrayna mediasının yazdığına görə, bundan sonra Prezident Volodimir Zelenski Kravçenkonun istefası ilə bağlı qərarı Ali Radaya təqdim edib. Daha sonra dövlət başçısı hərbi vəziyyət çərçivəsində ona verilən səlahiyyətlərdən istifadə edərək Kravçenkonu baş prokuror vəzifəsindən kənarlaşdırıb.
