Dövlət İmtahan Mərkəzi (DİM) vətəndaşlara sosial şəbəkələrdə yayılan saxta elanlarla bağlı xəbərdarlıq edib.
ilkinxeber.az xəbər verir ki, DİM-in məlumatına əsasən, son vaxtlar “Instagram”, “TikTok” və xüsusilə “Telegram” platformalarında saxta hesablar vasitəsilə imtahan nəticələrinin artırılması və ya yüksək bal əldə olunmasına kömək göstərilməsi adı altında vətəndaşların aldadılmasına cəhd edilir.
Qeyd olunub ki, dələduzlar etibarlı görünmək üçün DİM-in adı və loqosundan qanunsuz şəkildə istifadə edir, hətta saxta hesablar vasitəsilə öz paylaşımlarına müsbət rəylər yazaraq insanlarda inam yaratmağa çalışırlar.
Mərkəz abituriyentləri və valideynləri bu cür təkliflərə aldanmamağa çağırıb. Bildirilib ki, imtahan nəticələrinə kənardan müdaxilə etmək mümkün deyil və bu kimi qanunsuz fəaliyyətlər hüquqi məsuliyyət yarada bilər.
DİM həmçinin vurğulayıb ki, belə saxta səhifələr barədə məlumatlar mütəmadi olaraq hüquq-mühafizə orqanlarına təqdim edilir. Vətəndaşlara yalnız rəsmi mənbələrə etibar etmək və öz biliklərinə güvənmək tövsiyə olunub.
