Əmlakı üzərinə həbs qoyulan şəxslərin hüquq və vəzifələri genişləndirilir
İLKİNxeber.az informasiya agentliyinin məlumatına əsasən, əmlakı üzərinə həbs qoyulan şəxslərlə bağlı Cinayət Prosessual Məcəlləsinə dəyişikliklər qəbul edilib.
Layihəyə əsasən, təqsirləndirilən şəxs olmayan, lakin əmlakı üzərinə həbs qoyulması barədə qərarla qanuni mənafeyinə toxunulan fiziki və ya hüquqi şəxslər barədə məlumatlandırma qaydası yenilənir. Belə şəxslər onların məlum olan son yaşayış və ya yerləşmə ünvanına bildiriş göndərilməklə cinayət prosesini həyata keçirən orqan tərəfindən xəbərdar ediləcəklər.
Dəyişikliyə görə, həmin şəxsin müraciəti əsasında üç gündən gec olmayaraq o, prosesə qanuni mənafeyinə toxunulan şəxs qismində cəlb edilə bilər və bununla bağlı müvafiq qərar qəbul olunur.
Qanunvericiliyə əsasən, bu kateqoriyadan olan şəxslərə aşağıdakı hüquqlar verilir. Onlar sübut və materiallar təqdim edə, etiraz və vəsatətlər verə, birinci və apellyasiya instansiyası məhkəmələrində iştirak edə biləcəklər. Həmçinin kassasiya və əlavə kassasiya mərhələlərində də öz mövqelərini ifadə etmək hüququ əldə edirlər.
Bundan əlavə, həmin şəxslər məhkəmə iclasında digər iştirakçıların vəsatət və təkliflərinə münasibət bildirmək, nümayəndə seçmək, ana dilində ifadə vermək və qərarlarla bağlı məlumat almaq hüququna malik olacaqlar.
Eyni zamanda onların üzərinə müəyyən vəzifələr də qoyulur. Bunlara cinayət prosesini həyata keçirən orqanın çağırışına gəlmək, göstərişlərə əməl etmək, məhkəmə iclasında qaydaya riayət etmək, icazəsiz zalı tərk etməmək və məxfi məlumatların yayılmaması daxildir.
Müzakirələrdən sonra dəyişikliklər səsverməyə çıxarılaraq üçüncü oxunuşda qəbul edilib.
