Dübəndidə sahilboyu ərazilərin təmizlənməsi istiqamətində növbəti aksiya keçirilib
Heydər Əliyev Fondunun vitse prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə Dübəndi yaşayış sahəsində genişmiqyaslı təmizlik aksiyası təşkil olunub.
İLKİNxeber.az informasiya agentliyinin əldə etdiyi məlumata görə, IDEA İctimai Birliyinin təşkilatçılığı və Fövqəladə Hallar Nazirliyinin dəstəyi ilə həyata keçirilən aksiya zamanı sahilboyu ərazilərdə toplanmış neft tullantılarının və neftlə çirklənmiş qalıqların yığılması və ərazidən uzaqlaşdırılması işləri aparılıb.
Tədbir iştirakçılarının təhlükəsizliyinin təmin edilməsi məqsədilə aksiyaya başlamazdan əvvəl onlara xüsusi təlim keçirilib. Təlim zamanı neft tullantıları ilə işləmə qaydaları, fərdi mühafizə vasitələrindən düzgün istifadə və fövqəladə hallarda davranış qaydaları barədə ətraflı məlumat verilib.
Keçirilən təmizlik tədbiri nəticəsində toplanan tullantılar müvafiq qaydalara uyğun şəkildə zərərsizləşdirilməsi üçün aidiyyəti qurumlara təhvil verilib.
Ekoloji vəziyyətin yaxşılaşdırılmasına xidmət edən bu cür aksiyaların ətraf mühitin qorunması və sahilyanı ərazilərin təmiz saxlanılması baxımından mühüm əhəmiyyət daşıdığı vurğulanır.
