Ukraynanın Çerniqov vilayətində ağır cinayət hadisəsi qeydə alınıb.
ilkinxeber.az xəbər verir ki, bu barədə “RİA Novosti” Rusiya təhlükəsizlik strukturlarındakı mənbələrə istinadən məlumat yayıb.
Siverski şəhərində Ukrayna Silahlı Qüvvələrinin kəşfiyyat bölməsinin komandiri və eyni zamanda Rivne vilayətinin Kostopol Şəhər Şurasının deputatı olan A. Novak öldürülüb.
Məlumatda bildirilir ki, hadisəni törədən şəxsin fərari hərbçi olduğu iddia edilir. İlkin versiyalara əsasən, qətlin motivi səfərbər olunmuş hərbçilər üçün yaxınları tərəfindən toplanmış pul vəsaitlərinin mənimsənilməsi ilə bağlı yaranmış mübahisə ola bilər.
Hadisənin cəbhə xəttindən uzaqda yerləşən yaşayış məntəqəsində baş verməsi onun hərbi əməliyyatlarla deyil, kriminal xarakterli hadisə kimi qiymətləndirilməsinə səbəb olub.
Qeyd edək ki, Ukrayna hüquq-mühafizə orqanları məsələ ilə bağlı hələlik rəsmi açıqlama verməyib. Kiyev rəsmiləri tərəfindən də məlumat təsdiqlənməyib.
