Nazirlər Kabineti büdcə sisteminin təkmilləşdirilməsi istiqamətində növbəti qərar qəbul edib.
İLKİNxeber.az xəbər verir ki, Baş nazir Əli Əsədovun imzaladığı yeni qərara əsasən, “Vahid büdcə təsnifatının təsdiq edilməsi barədə” Nazirlər Kabinetinin 11 oktyabr 2018-ci il tarixli qərarında dəyişiklik edilib.
Dəyişikliyə əsasən, bir sıra dövlət qurumları, agentliklər, fondlar, ali təhsil müəssisələri və digər təşkilatlar büdcə xərclərinin inzibati təsnifatına daxil olunub.
Siyahıya Azərbaycan Nəqliyyat və Kommunikasiya Holdinqi (AZCON), Azərbaycan Biznesinin İnkişafı Fondu, Kiçik və Orta Biznesin İnkişafı Agentliyi, İnvestisiyaların və İxracın Təşviqi Agentliyi, Dövlət Müəssisələrinin Monitorinqi Agentliyi, Geodeziya və Kartoqrafiya Agentliyi, Dövlət Mineral Xammal Ehtiyatlarından İstifadə Agentliyi, Dövlət Tibbi Sığorta və Ekspertiza Agentliyi, Qarabağ Universiteti, Milli İdman Tibb və Reabilitasiya Elmi Praktiki İnstitutu, eləcə də digər qurumlar daxil edilib.
Qərarla yanaşı, Prezidentin Ehtiyat Fondu və Dövlət büdcəsinin Ehtiyat Fondu da inzibati təsnifat çərçivəsində ayrıca nəzərə alınıb.
Qeyd edək ki, inzibati təsnifat büdcə vəsaitlərinin hansı dövlət orqanları və təşkilatlar tərəfindən istifadə olunduğunu müəyyənləşdirən əsas maliyyə mexanizmlərindən biridir.
