İLKİNxeber.az informasiya agentliyinin əldə etdiyi məlumata görə, iyunun 17-də ölkə ərazisində hava şəraitinin əsasən sabit keçəcəyi gözlənilir.
Bakıda və Abşeron yarımadasında hava dəyişkən buludlu olacaq, gün ərzində əsasən yağmursuz keçəcək. Şimal-qərb küləyinin günün ikinci yarısında cənub-şərq küləyi ilə əvəz olunacağı bildirilir.
Paytaxtda havanın temperaturunun gecə saatlarında 19-22 dərəcə isti, gündüz isə 29-34 dərəcə isti olacağı proqnozlaşdırılır. Atmosfer təzyiqi 763 millimetr civə sütunu təşkil edəcək. Nisbi rütubətin gecə 70-75 faiz, gündüz isə 50-60 faiz arasında dəyişəcəyi gözlənilir. Azərbaycanın əksər rayonlarında da hava əsasən yağmursuz keçəcək. Bununla yanaşı, günün ikinci yarısında bəzi dağlıq və dağətəyi ərazilərdə qısamüddətli yağış yağacağı ehtimal olunur. Ayrı-ayrı yerlərdə şimşək çaxacağı, leysan xarakterli yağıntı düşəcəyi və dolu olacağı istisna edilmir. Gecə və səhər saatlarında bəzi bölgələrdə duman müşahidə oluna bilər.
Rayonlarda havanın temperaturu gecə 19-22 dərəcə isti, gündüz 30-35 dərəcə isti olacaq. Dağlıq ərazilərdə isə gecə 7-12 dərəcə isti, gündüz 16-20 dərəcə isti, bəzi yerlərdə isə 23-28 dərəcəyədək yüksələcəyi gözlənilir.
