İLKİNxeber.az informasiya agentliyi məlumat verir ki, “Süni intellekt dövründə insan hüquqları: imkanlar, risklər və məsuliyyətlər” mövzusunda keçirilən sammitdə Prezidentin müraciətini ədliyyə naziri Fərid Əhmədov səsləndirib.
Dövlət başçısı müraciətində sammit iştirakçılarını salamlayaraq bildirib ki, tədbirin 18 İyun – Azərbaycanda İnsan Hüquqları Günündə keçirilməsi xüsusi əhəmiyyət daşıyır. Qeyd olunub ki, bu tarix Ümummilli Lider Heydər Əliyev tərəfindən ölkədə insan hüquqlarının müdafiəsinə dair ilk dövlət proqramının təsdiq edildiyi gün kimi tarixə düşüb.
Prezident vurğulayıb ki, müasir dövrdə süni intellekt texnologiyalarının sürətli inkişafı insan hüquqları sahəsində yeni çağırışlar və prioritetlər formalaşdırır. Azərbaycan bu prosesdə texnoloji tərəqqinin insan amilinə xidmət etməsini əsas prinsip kimi qəbul edir.
Müraciətdə qeyd olunub ki, ölkədə süni intellekt və innovativ texnologiyaların təhlükəsiz, şəffaf və insan hüquqlarına əsaslanan prinsiplərlə tətbiqi istiqamətində mühüm addımlar atılır. Bu sahədə qəbul edilən hüquqi sənədlər və strateji proqramlar inklüziv inkişafı və rəqəmsal transformasiyanı təşviq edir.
Eyni zamanda, Azərbaycanın yeni rəqəmsal arxitektura təşəbbüsləri, dövlət idarəçiliyində süni intellektin tətbiqi, informasiya təhlükəsizliyi və milli süni intellekt infrastrukturunun inkişafı ölkənin müasir çağırışlara uyğun strateji yanaşmasını əks etdirir.
Prezident müraciətində Bakıda keçirilmiş BMT-nin Ümumdünya Şəhərsalma Forumunun 13-cü sessiyasını da xatırladaraq, bu tədbirin dayanıqlı inkişaf və rəqəmsal idarəetmə sahəsində beynəlxalq əməkdaşlığa töhfə verdiyini qeyd edib.
Bununla yanaşı, işğaldan azad edilmiş ərazilərdə həyata keçirilən “ağıllı şəhər” və “ağıllı kənd” layihələrinin innovativ inkişaf modeli kimi önəm daşıdığı vurğulanıb.
Dövlət başçısı sonda bildirib ki, ombudsman institutları yeni texnoloji dövrdə insan hüquq və azadlıqlarının qorunmasında mühüm rol oynayır və Bakı Sammitinin bu sahədə beynəlxalq əməkdaşlığın genişlənməsinə ciddi töhfə verəcəyinə əminliyini ifadə edib.
Prezident İlham Əliyev sammit iştirakçılarına uğurlar arzulayıb.
