Rusiyanın paytaxtı Moskva son iki ilin ən böyük pilotsuz uçuş aparatı hücumuna məruz qalıb.
İLKİNxeber.az informasiya agentliyinin əldə etdiyi məlumata görə, Moskva meri Sergey Sobyanin iyunun 18-nə keçən gecədən etibarən şəhər və ətraf ərazilərdə ümumilikdə 85 pilotsuz uçuş aparatının zərərsizləşdirildiyini açıqlayıb.
Məlumata əsasən, bu göstərici son iki ildə qeydə alınan ən irimiqyaslı dron hücumlarından biri hesab olunur. Bundan əvvəl paytaxta qarşı ən böyük hücum bu ilin mayın 17-də baş vermiş, həmin vaxt 81 pilotsuz uçuş aparatının vurulduğu bildirilmişdi.
İlkin məlumatlara görə, hücum nəticəsində Moskva yaxınlığında yerləşən neft emalı müəssisələrindən birində yanğın baş verib. Təhlükəsizlik səbəbindən bir sıra hava limanlarının fəaliyyəti müvəqqəti olaraq dayandırılıb.
Hadisə ilə bağlı araşdırmalar davam edir, dağıntı və mümkün zərər barədə əlavə məlumatların açıqlanacağı gözlənilir.
