Azərbaycan Prezidenti İlham Əliyev məktəbəqədər təhsil sahəsində yeni maliyyələşmə mexanizminin tətbiqi ilə bağlı fərman imzalayıb.
İLKİNxeber.az informasiya agentliyi xəbər verir ki, sənədə əsasən, bu sahədə valideyn–dövlət–özəl əməkdaşlığına əsaslanan maliyyələşmə modeli tətbiq olunacaq.
Fərmana görə, qeyd olunan model çərçivəsində dövlət dəstəyi hər ilin dövlət büdcəsində Azərbaycan Respublikasının Elm və Təhsil Nazirliyi üçün nəzərdə tutulmuş məqsədli vəsait hesabına maliyyələşdiriləcək.
Sənəddə həmçinin bildirilir ki, Nazirlər Kabineti üç ay müddətində yeni maliyyələşmə modelinin tətbiqi qaydasını təsdiq etməli və bununla bağlı Prezidentə məlumat təqdim etməlidir. Bununla yanaşı, fərmandan irəli gələn digər məsələlərin həlli də təmin olunmalıdır.
Bundan əlavə, Elm və Təhsil Nazirliyi hər növbəti maliyyə ili üzrə bu modelin tətbiqi üçün tələb olunan vəsaitin həcmini Azərbaycan Respublikasının Maliyyə Nazirliyi ilə razılaşdırmaqla müəyyən edəcək.
