İstanbulun M4 Kadıköy–Sabiha Gökçen Havalimanı metro xəttində ciddi insident baş verib. Bostancı stansiyası yaxınlığında hərəkətdə olan qatar hələlik səbəbi dəqiqləşdirilməyən texniki nasazlıq nəticəsində relsdən çıxıb.
İLKİNxeber.az informasiya agentliyi məlumat verir ki, hadisədən dərhal sonra vaqonlardakı sərnişinlər arasında qısa müddətli təşviş yaşanıb. Sərnişinlər öz imkanları ilə vaqonları tərk edərək tunel vasitəsilə təhlükəsiz əraziyə çıxmaq məcburiyyətində qalıblar.
Hadisə yerinə operativ şəkildə yanğınsöndürmə briqadaları, təcili tibbi yardım qrupları və “Metro İstanbul”un qəza-bərpa xidmətinin əməkdaşları cəlb olunub. İlkin məlumata görə, xəsarət alan yoxdur, lakin təxliyə zamanı müəyyən çətinliklər yaşanıb.
Qəza ilə əlaqədar metro xəttinin bir hissəsində hərəkət müvəqqəti dayandırılıb. Hazırda hadisənin səbəbləri araşdırılır, nasazlığın aradan qaldırılması üçün qəza-bərpa briqadaları gücləndirilmiş rejimdə çalışır.
