Azərbaycan Hava Yolları (AZAL) donanmasını daha bir müasir hava gəmisi ilə gücləndirib. İlkinxeber.az informasiya agentliyi xəbər verir ki, aviaşirkət yeni nəsil “Airbus A321neo” təyyarəsini istismara verib.
Bildirilib ki, yeni təyyarənin donanmaya qoşulması AZAL-ın donanmanın modernləşdirilməsi strategiyasının növbəti mərhələsidir. Yeni hava gəmisi sərnişin daşımalarının artırılmasına, əməliyyat səmərəliliyinin yüksəldilməsinə və xidmət keyfiyyətinin daha da yaxşılaşdırılmasına imkan yaradacaq. Eyni zamanda, marşrut şəbəkəsinin genişləndirilməsi istiqamətində aviaşirkətə əlavə çeviklik qazandıracaq.
Məlumata görə, “Airspace” salon konsepsiyası ilə təchiz edilən “Airbus A321neo” daha geniş və komfortlu interyer, fərdiləşdirilə bilən işıqlandırma, iri pəncərələr, tam LED işıqlandırma sistemi və geniş əl yükü bölmələri ilə seçilir. Təyyarə əvvəlki nəsil modellərlə müqayisədə hər oturacaq üzrə təxminən 20 faiz daha az yanacaq sərf edir və karbon emissiyasını azaldır. Uçuş məsafəsi isə 7 400 kilometrədəkdir.
191 sərnişin tutumuna malik olan təyyarə ən son nəsil bortdaxili əyləncə sistemi (IFE) və yüksək sürətli “Wi-Fi” xidməti ilə də təchiz olunub. Bu da sərnişinlərə uçuş zamanı internetdən istifadə etmək, rəqəmsal xidmətlərə çıxış əldə etmək və əyləncə imkanlarından yararlanmaq imkanı verir.
Açıqlamada qeyd olunub ki, yaxın vaxtlarda yeni “Airbus A320neo” təyyarəsinin də donanmaya qoşulmasından sonra “Airbus A321neo”nun istismara verilməsi AZAL-ın müasir və yanacaq baxımından səmərəli təyyarə parkının formalaşdırılması istiqamətində həyata keçirdiyi siyasətin davamıdır.
Həmçinin bildirilib ki, uzunmüddətli inkişaf strategiyasına əsasən, AZAL 2032-ci ilədək donanmasındakı təyyarələrin sayını 50-yə çatdırmağı planlaşdırır. Cari ilin sonuna qədər daha bir neçə yeni hava gəmisinin təhvil alınması gözlənilir. Bununla da 2026-cı ildə donanmaya daxil edilən yeni təyyarələrin sayı səkkizə çatacaq ki, bu da AZAL tarixində bir il ərzində həyata keçirilən ən genişmiqyaslı donanma yenilənməsi kimi qiymətləndirilir.
Qeyd olunub ki, donanmanın yenilənməsi həm marşrut şəbəkəsinin genişləndirilməsinə, həm də AZAL-ın regionun aparıcı hava daşıyıcılarından biri kimi mövqeyinin daha da möhkəmlənməsinə xidmət edəcək.
