Doha ABŞ və İran arasında mühüm danışıqlara ev sahibliyi edəcək
ABŞ ilə İran arasında gərginliyin azaldılması istiqamətində növbəti diplomatik təmasın iyunun 30 da Qətərin paytaxtı Doha şəhərində keçirilməsi gözlənilir.
İLKİNxeber.az informasiya agentliyi xəbər verir ki, “Axios”un yaydığı məlumata əsasən, görüşdə əsas müzakirə mövzularından biri Hörmüz boğazında yaranmış vəziyyət olacaq. Nəşrin amerikalı rəsmiyə istinadən verdiyi məlumata görə, tərəflər qarşılıqlı atəşin dayandırılması barədə ilkin razılığa da gəlib.
Mənbələr bildirirlər ki, danışıqlar zamanı iki ölkə arasında əvvəllər əldə olunmuş anlaşma memorandumunun müxtəlif istiqamətləri üzrə texniki müzakirələrin davam etdirilməsi nəzərdə tutulur.
Qeyd edək ki, bölgədə gərginlik son günlər daha da artıb. ABŞ Mərkəzi Komandanlığı ötən həftəsonu İranın 10 hərbi obyektinə zərbələr endirildiyini açıqlayıb. Vaşinqton bu əməliyyatın Panama bayrağı altında üzən və 2 milyon bareldən artıq neft daşıyan “Kiku” tankerinə edilən hücuma cavab məqsədi daşıdığını bəyan edib.
