Fransanın cənubunda, Nitsa şəhəri yaxınlığında yerləşən Kan-syur-Mer kommunasındakı Oqüst Renuar muzeyindən dörd rəsm əsəri oğurlanıb.
ilkinxeber.az informasiya agentliyi xəbər verir ki, hadisə çərşənbə axşamı səhər saatlarında baş verib. Naməlum şəxslər muzeyə daxil olaraq rəsm əsərlərini çərçivələrindən kəsib aparıblar.
Məlumata görə, yerli vaxtla saat 06:00 radələrində muzeydə həyəcan siqnalı işə düşüb və polisə məlumat verilib. Təhlükəsizlik kameralarının görüntülərini araşdıran hüquq-mühafizə orqanları iki şəxsin əsərləri çərçivələrindən çıxararaq apardığını müəyyənləşdiriblər.
İlkin məlumata əsasən, muzeydən dörd sənət əsəri oğurlanıb. Əsərlərin adları və onların ümumi dəyəri hələlik açıqlanmayıb.
Qeyd edək ki, son illərdə Fransada muzeylərə qarşı oğurluq hallarının artması ölkənin mədəni irs obyektlərinin təhlükəsizliyi ilə bağlı narahatlıqları gücləndirib. 2025-ci ilin oktyabrında Luvr muzeyindən Fransa monarxlarına məxsus qiymətli zinət əşyaları oğurlanmışdı. Həmin dövrdə Lanqr şəhərindəki Deni Didro Maarifçilik Evinə də daxil olan cinayətkarlar qızıl və gümüş sikkələrdən ibarət kolleksiyanı aparmışdılar.
Bu hadisələrdən sonra Fransanın Daxili İşlər Nazirliyi muzeylərdə və digər mədəni irs obyektlərində təhlükəsizlik tədbirlərinin gücləndirilməsi barədə göstəriş vermişdi.
