İlkinxeber.az informasiya agentliyi məlumat verir ki, bu məsələ Milli Məclisin bugünkü birgə iclasında müzakirəyə çıxarılan Cinayət Məcəlləsinə dəyişiklik edilməsi haqqında qanun layihəsində əksini tapıb.
Layihəyə əsasən, qumar oyunlarının virtual formada — internet, mobil rabitə şəbəkələri, sosial platformalar və digər elektron vasitələr üzərindən təşkili və keçirilməsi daha ağır məsuliyyətə səbəb olacaq. Bu hallarda təqsirli şəxslər cinayət nəticəsində əldə olunan gəlirin iki mislinədək cərimə olunmaqla yanaşı, iki ildən dörd ilədək azadlığın məhdudlaşdırılması və ya eyni müddətə azadlıqdan məhrum edilə bilərlər.
Qeyd edək ki, hazırkı qanunvericilikdə cərimə məbləği konkret olaraq 10 min manatdan 15 min manatadək müəyyən edilib. Yeni təklifdə isə cərimənin məbləği əldə edilən gəlirin həcminə uyğun olaraq dəyişəcək.
Bundan əlavə, qumar oyunlarının təşkili və keçirilməsi, bu məqsədlə yer ayrılması və ya saxlanılması hallarının təkrar törədilməsi, yetkinlik yaşına çatmayanların bu oyunlara cəlb edilməsi, həmçinin böyük məbləğdə gəlir əldə edilməsi kimi ağırlaşdırıcı hallar üzrə cəzaların daha da sərtləşdirilməsi planlaşdırılır.
Mövcud qanunvericiliyə əsasən, bu əməllərə görə 4 ildən 5 ilədək azadlığın məhdudlaşdırılması və ya 4 ildən 8 ilədək azadlıqdan məhrumetmə cəzası tətbiq olunur. Yeni layihədə isə bu müddətin 5 ildən 8 ilədək azadlıqdan məhrumetmə ilə əvəz olunması təklif edilir.
Qanun layihəsi səsverməyə çıxarılaraq Milli Məclisdə üçüncü oxunuşda qəbul edilib.
