İlkinxeber.az informasiya agentliyi məlumat verir ki, Azərbaycan tez-tez beynəlxalq dezinformasiya kampaniyalarının hədəfinə çevrilir.
Bu fikirləri Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev IV Şuşa Qlobal Media Forumunda çıxışı zamanı səsləndirib.
O bildirib ki, son illərdə ölkədə media mühitinin hərtərəfli modernləşdirilməsi istiqamətində mühüm addımlar atılır. Bu islahatlar peşəkar jurnalistikanın gücləndirilməsi, institusional potensialın artırılması, etik standartların təşviqi, media savadlılığının inkişafı və medianın sürətli texnoloji dəyişikliklərə uyğunlaşmasına xidmət edir.
Hikmət Hacıyev qeyd edib ki, media islahatlarının əsas məqsədi dayanıqlı institutların qurulması, müstəqil jurnalistikanın dəstəklənməsi, dezinformasiyaya qarşı müqavimətin artırılması və ictimai etimadın gücləndirilməsidir.
O əlavə edib ki, bir çox siyasətçilər və ekspertlər Azərbaycana qarşı yönəlmiş genişmiqyaslı dezinformasiya və qarayaxma kampaniyalarını müşahidə ediblər. Bu kimi hallara qarşı faktların yoxlanılması və faktlara əsaslanan cavabların verilməsi vacibdir.
Prezident köməkçisinin sözlərinə görə, müasir dövrdə həqiqəti sübut etmək daha da çətinləşib. Belə ki, texnologiya nəhəngləri və bəzən peşəkar jurnalistikanın rolunu yerinə yetirməli olan bəzi qurumlar da dezinformasiyanın yayılmasında iştirak edə bilirlər.
Hikmət Hacıyev vurğulayıb ki, hökumətlər, media qurumları, texnologiya şirkətləri, akademik dairələr və vətəndaş cəmiyyəti şəffaf, dəqiq və hesabatlı informasiya mühitinin formalaşdırılması üçün birgə məsuliyyət daşıyırlar.
Sonda o qeyd edib ki, dialoq, peşəkar jurnalistika və qarşılıqlı hörmət vasitəsilə ictimai etimadı bərpa etmək mümkündür.
