Azərbaycan Müdafiə Nazirliyinin nümayəndə heyəti Türkiyəyə işgüzar səfəri çərçivəsində bu ölkənin Milli Müdafiə naziri Yaşar Güler ilə görüş keçirib.
İlkinxeber.az informasiya agentliyi məlumat verir ki, görüş zamanı Azərbaycan və Türkiyə arasında hərbi, hərbi-texniki və müdafiə sənayesi sahələrində əməkdaşlığın hazırkı vəziyyəti və inkişaf perspektivləri müzakirə olunub. Tərəflər iki qardaş ölkə arasında strateji müttəfiqlik münasibətlərinin daha da möhkəmləndirilməsinin vacibliyini vurğulayıblar.
Bildirilib ki, keçirilən görüşdə həmçinin regional təhlükəsizlik məsələləri, birgə hərbi təlimlər və qarşılıqlı təcrübə mübadiləsi ilə bağlı fikir mübadiləsi aparılıb. Qarşılıqlı əməkdaşlığın genişləndirilməsi istiqamətində yeni təşəbbüslər nəzərdən keçirilib.
Qeyd edək ki, Azərbaycan və Türkiyə arasında müdafiə sahəsində əməkdaşlıq son illərdə daha da dərinləşib və bu istiqamətdə yüksək səviyyəli qarşılıqlı səfərlər mütəmadi xarakter daşıyır.
