Pakistan ABŞ ilə İran arasında dialoqun bərpasına çalışır
ilkinxeber.az informasiya agentliyi xəbər verir ki, Pakistan Silahlı Qüvvələrinin baş komandanı Asim Munirin Tehrana səfəri zamanı İranın ABŞ ilə bağlı mövqeyi Pakistan tərəfinə çatdırılıb.
İran tərəfi bildirib ki, Vaşinqtonun İslamabad sazişinə, yəni anlaşma memorandumuna qayıtması və sənədin müddəalarının icrası Tehran üçün ABŞ ilə dialoqun bərpasının əsas şərtlərindən biridir. Bu şərtlər sırasında İranın Hörmüz boğazını idarə etməsi ilə bağlı 5-ci maddənin icrası da yer alır.
Məlumata görə, Pakistan bu mövqeyi ABŞ tərəfinə çatdırmağa çalışır.
Asim Munirin İran rəhbərliyi ilə keçirdiyi görüşlər zamanı ABŞ-dən Tehrana hər hansı təhdid və ya oxşar məzmunlu mesaj ötürmədiyi də bildirilir. Əksinə, Pakistan Silahlı Qüvvələrinin baş komandanının əsas məqsədinin ABŞ və İran arasında danışıqların bərpası və diplomatik dialoqun davam etdirilməsi üçün əlverişli şərait yaratmaq olduğu qeyd olunur.
Beləliklə, Pakistanın ABŞ və İran arasında gərginliyin azaldılması və tərəflərin yenidən danışıqlar masasına qayıtması istiqamətində vasitəçilik səylərini davam etdirdiyi görünür.
