İran Hörmüz boğazında bütün növ gəmilərin hərəkətinin dayandırıldığını açıqlayıb.
İLKİNxeber.az xəbər verir ki, bu barədə İran Silahlı Qüvvələrinin əməliyyatlara rəhbərlik edən “Xatəm əl Ənbiya” Mərkəzi Qərargahı bəyanat yayıb.
Bəyanatda bildirilib ki, bölgədə təhlükəsizlik vəziyyətinin kəskin şəkildə gərginləşməsi səbəbindən Hörmüz boğazı neft tankerləri və kommersiya gəmiləri də daxil olmaqla bütün dəniz nəqliyyatı üçün bağlanıb. Qərargah keçidə cəhd edən istənilən gəminin hədəfə alınacağını vurğulayıb.
Məlumata görə, qərar ABŞ qüvvələrinin İran ərazisindəki hədəflərə endirdiyi son zərbələrdən sonra qəbul olunub. İran tərəfi bunu bölgədə təhlükəsizliyə təhdid kimi qiymətləndirib.
Bundan əlavə, İran İnqilab Keşikçiləri Korpusu (SEPAH) Hörmüz boğazı ətrafında hərəkət edən və “qanunsuz keçid” etdiyi iddia olunan iki gəminin vurulduğunu açıqlayıb.
Qeyd edək ki, Hörmüz boğazı dünya neft ticarətinin mühüm hissəsinin həyata keçirildiyi strateji su yoludur. Boğazın bağlanması qlobal enerji bazarlarında ciddi təsirlərə səbəb ola bilər.
