İlkinxeber.az informasiya agentliyi məlumat verir ki, təcili tibbi yardım xidmətinin operativliyinin artırılması məqsədilə Tibbi Ərazi Bölmələrini İdarəetmə Birliyi (TƏBİB) tərəfindən yeni “Ambucycle” xidmət modelinin tətbiqinə başlanılıb.
Qeyd olunub ki, xüsusilə nəqliyyat sıxlığının müşahidə olunduğu ərazilərdə və pik saatlarda hadisə yerinə daha tez çatmaq üçün nəzərdə tutulan bu model həyati əhəmiyyət daşıyan ilk dəqiqələrdə tibbi müdaxilənin operativ şəkildə göstərilməsinə imkan yaradacaq. Xidmət ilkin mərhələdə pilot layihə kimi Bakı şəhərində həyata keçiriləcək.
“Ambucycle” xüsusi tibbi avadanlıqlarla təchiz edilmiş motosikletdən ibarətdir və onu peşəkar hazırlıq keçmiş feldşer idarə edir. Bu briqadalar hadisə yerində ürək-ağciyər reanimasiyası (BLS və ALS), ürəyin qapalı masajı, defibrilyasiya, ağrıların aradan qaldırılması, sınıqlar zamanı immobilizasiya və digər təxirəsalınmaz tibbi yardımları həyata keçirə bilir. Eyni zamanda, zərurət yarandıqda tam təchizatlı təcili yardım briqadasının cəlb olunmasını koordinasiya edir.
Məlumata əsasən, xidmətə cəlb olunan feldşerlər İ.M.Seçenov adına Birinci Moskva Dövlət Tibb Universitetinin Bakı filialında, Yeni Klinikada və Respublika Təcili və Təxirəsalınmaz Tibbi Yardım Mərkəzində xüsusi nəzəri və praktiki təlimlərdən keçiblər.
Bildirilib ki, bu model artıq İsrail və Böyük Britaniya kimi ölkələrdə uğurla tətbiq olunur və təcili yardımın hadisə yerinə çatma müddətini əhəmiyyətli dərəcədə azaldır.
“Ambucycle” xidmətinin tətbiqi təcili tibbi yardımın əlçatanlığını və operativliyini artıracaq. Pilot mərhələnin nəticələrindən asılı olaraq layihənin gələcəkdə daha geniş ərazilərdə tətbiqi planlaşdırılır.
