Baş Prokurorluq Gürcüstanda qətlə yetirilən Azərbaycan vətəndaşı ilə bağlı açıqlama yayıb
ilkinxeber.az informasiya agentliyi xəbər verir ki, Gürcüstanın Tbilisi şəhərində Azərbaycan vətəndaşı Fatimə Kərimovanın qəsdən öldürülməsi faktı ilə bağlı həmin ölkənin prokurorluq orqanları tərəfindən aparılan ibtidai istintaq Azərbaycan Baş Prokurorluğu tərəfindən diqqətlə izlənilir.
Baş Prokurorluğun yaydığı məlumata əsasən, cinayət əməlini törətməkdə şübhəli bilinən, zərərçəkmişin qohumu olan şəxsin saxlanılması və cinayət məsuliyyətinə cəlb edilməsi istiqamətində Gürcüstanın aidiyyəti qurumları tərəfindən müvafiq prosessual tədbirlər həyata keçirilir.
Məlumatda bildirilir ki, hadisənin ictimai əhəmiyyəti və zərərçəkmişin Azərbaycan vətəndaşı olması nəzərə alınaraq, Azərbaycan Baş Prokurorluğu tərəfindən Gürcüstan Prokurorluğuna rəsmi müraciət ünvanlanıb. Müraciətdə cinayət işinin tam, hərtərəfli və obyektiv araşdırılması, bütün halların qanunvericiliyin tələblərinə uyğun müəyyənləşdirilməsi, həmçinin zərurət yarandığı halda beynəlxalq hüquqi əməkdaşlıq çərçivəsində istintaqa hüquqi yardım və digər dəstəyin göstərilməsinə hazır olunduğu ifadə edilib.
Baş Prokurorluq vurğulayıb ki, Azərbaycan vətəndaşlarının həyat və sağlamlığına, eləcə də qanunla qorunan hüquq və mənafelərinə qarşı törədilən cinayət əməllərinə qarşı prinsipial mövqe nümayiş etdirilir. Belə hadisələrin ölkə hüdudlarından kənarda baş verməsindən asılı olmayaraq, vətəndaşların hüquq və qanuni mənafelərinin müdafiəsi daim diqqətdə saxlanılır.
Qurum qeyd edib ki, xarici dövlətlərin səlahiyyətli orqanları ilə beynəlxalq hüquqi əməkdaşlıq çərçivəsində qarşılıqlı hüquqi yardımın göstərilməsi və cinayətlərin tam, obyektiv araşdırılmasına dəstək məqsədilə zəruri tədbirlər bundan sonra da davam etdiriləcək.
