Quba–Xınalıq yolunda təhlükəli vəziyyət

Quba–Xınalıq avtomobil yolunun 35-ci kilometrliyində torpaq sürüşməsi nəticəsində yolun hərəkət hissəsində çökmə baş verib.
İlkinxeber.az informasiya agentliyi məlumat verir ki, son günlər bölgədə yağan intensiv yağışlardan sonra yolun bir hissəsi sürətlə dərəyə doğru sürüşməyə başlayıb.
Sözügedən yol yeddi yaşayış məntəqəsinin sakinlərinin gündəlik istifadə etdiyi əsas nəqliyyat marşrutlarından biri olmaqla yanaşı, bölgənin mühüm turizm istiqamətlərindən hesab olunur.
Sakinlərin sözlərinə görə, sürüşmələr səbəbindən yolda hərəkət çətinləşib və təhlükəli vəziyyət yaranıb.
Azərbaycan Avtomobil Yolları Dövlət Agentliyindən bildirilib ki, Quba–Xınalıq avtomobil yolunda torpaq sürüşməsi nəticəsində yaranmış fəsadların aradan qaldırılması istiqamətində işlər görülür.
Qeyd olunub ki, hadisənin baş verdiyi ərazidə nəqliyyat vasitələrinin hərəkəti üçün yolun digər zolağı təhlükəsizlik tədbirləri təmin edilməklə açıq saxlanılıb.