Rusiyada strateji enerji obyektlərinə PUA hücumları: Neft bazalarında yanğınlar qeydə alındı
İyulun 23-nə keçən gecə Rusiyanın bir sıra regionları pilotsuz uçuş aparatlarının kütləvi hücumuna məruz qalıb. Hücumlar əsasən enerji və logistika infrastrukturunu hədəf alıb.
ilkinxeber.az informasiya agentliyinin əldə etdiyi məlumata görə, Voronej vilayətində ardıcıl partlayış səsləri eşidilib. Monitorinq resurslarının yaydığı məlumatlarda bildirilir ki, mümkün hədəflərdən biri əvvəllər də zərbəyə məruz qalmış “Wildberries” şirkətinin logistika mərkəzi olub. Məlumata əsasən, əvvəlki hücumlardan sonra həmin obyektin gecə növbəsində fəaliyyəti dayandırılmışdı.
Ulyanovsk vilayətinin Novospasskoye qəsəbəsində isə “NS-Oil” şirkətinə məxsus mayeləşdirilmiş qaz bazası və yaxınlıqda yerləşən neft bazasının PUA hücumuna məruz qaldığı bildirilir. Məlumatlara görə, hücum bir neçə saat davam edib.
Başqırdıstanın Tuymazı şəhərində yerləşən “Transneft-Ural” şirkətinə məxsus “Subxankulovo” xətti istehsalat-dispetçer stansiyasının da hədəf alındığı qeyd olunur. İlkin məlumatlara əsasən, obyektin çənlərindən birində yanğın baş verib.
Yerli sakinlərin sözlərinə görə, Tuymazı şəhəri ərazisində ən azı səkkiz partlayış qeydə alınıb.
Hadisələrlə bağlı Rusiya rəsmilərinin rəsmi açıqlamaları və hücumların nəticələri barədə əlavə məlumatların açıqlanacağı gözlənilir.
