“Toplum TV” işi üzrə aparılan məhkəmə araşdırması yekunlaşıb. ilkinxeber.az informasiya agentliyi xəbər verir ki, Bakı Ağır Cinayətlər Məhkəməsində keçirilən son prosesdə təqsirləndirilən şəxslər barəsində hökm elan olunub.
Hakim Azər Tağıyevin sədrliyi ilə keçirilən məhkəmə iclasında təqdim olunan sübutlar və iş materialları qiymətləndirildikdən sonra ittihamların əsaslı olduğu qənaətinə gəlinib.
Məhkəmənin hökmünə əsasən, Akif Qurbanov və Ruslan İzzətli 15 il, Ələsgər Məmmədli və Əli Zeynalov 14 il, Müşfiq Cabbarov, İlkin Əmrahov və Ramil Babayev 13 il, Fərid İsmayılov və Elmir Abbasov isə 12 il müddətinə azadlıqdan məhrum ediliblər.
İş üzrə təqsirləndirilən şəxslərə Cinayət Məcəlləsinin qaçaqmalçılıq, qanunsuz sahibkarlıq, cinayət yolu ilə əldə edilmiş vəsaitlərin leqallaşdırılması, vergidən yayınma və əmək müqaviləsi olmadan işçi çalışdırılması ilə bağlı bir sıra maddələri üzrə ittiham irəli sürülmüşdü. Məhkəmə həmin ittihamları əsaslı hesab edərək müvafiq cəzaları təyin edib.
