İlkinxeber.az informasiya agentliyi məlumat verir ki, Azərbaycan Respublikasının Qida Təhlükəsizliyi Agentliyi (AQTA) tərəfindən müxtəlif ölkələrdən ölkəyə idxal olunan bitki və palma yağlarının təhlükəsizlik göstəricilərinə nəzarət çərçivəsində yoxlamalar aparılıb.
Laborator müayinələr zamanı bir sıra xarici ölkə istehsalçılarına məxsus bitki yağı nümunələrində insan sağlamlığı üçün risk yarada bilən emal çirkləndiricisi – 3-MCPD (3-monoxlorpropan-1,2-diol) aşkarlanıb.
Aşkar edilmiş uyğunsuzluqlarla bağlı qanunvericiliyin tələblərinə uyğun tədbirlər görülüb. Həmçinin müəyyən xarici istehsalçıların bitki yağı məhsullarının Azərbaycana idxalına məhdudiyyətlər tətbiq edilib.
AQTA bitki və palma yağlarının idxalı ilə məşğul olan sahibkarlıq subyektlərini məhsulların təhlükəsizlik göstəricilərinə və qida təhlükəsizliyi tələblərinə ciddi əməl etməyə çağırıb.
Agentlik tərəfindən bu istiqamətdə nəzarət tədbirlərinin davam etdiriləcəyi bildirilib.
