İspaniyanın şərqində anomal isti hava şəraitindən sonra güclü külək, leysan və dolu ilə müşayiət olunan şiddətli fırtına baş verib.
ilkinxeber.az informasiya agentliyi xəbər verir ki, bu barədə İspaniyanın “El País” nəşri məlumat yayıb.
Məlumata görə, Valensiya əyalətində avqustun 19-da temperatur 44 dərəcəyə yaxınlaşıb. Şəhərdə gecə saatlarında da rekord istilər qeydə alınıb. Avqustun 20-də isə hava şəraiti kəskin dəyişərək güclü yağış və fırtınaya çevrilib.
Fırtına zamanı dolu düşüb, güclü külək müşahidə olunub. Bəzi ərazilərdə küləyin sürəti 149 kilometr saata çatıb. Təbii hadisə nəticəsində ağaclar aşıb, tikililərə və infrastruktura ziyan dəyib.
Ən çox zərər Valensiya əyalətinin bəzi ərazilərində qeydə alınıb. Mursiya və Albasete istiqamətində də hava şəraitinin pisləşdiyi bildirilir.
Beləliklə, İspaniyanın şərqində bir neçə saat ərzində rekord istilərdən güclü fırtınaya keçid yaşanıb.
