Azərbaycan və Özbəkistan arasında münasibətlər bütün istiqamətlər üzrə dinamik şəkildə inkişaf edir. Bu barədə Azərbaycanın xarici işlər naziri Ceyhun Bayramov “Özbəkistan 24” telekanalına müsahibəsində bildirib.
İlkinxeber.az informasiya agentliyi xəbər verir ki, nazir iki ölkə prezidentlərinin qarşılıqlı dövlət səfərlərinin artıq ənənəyə çevrildiyini qeyd edib. Ötən il Özbəkistan Prezidenti Şavkat Mirziyoyev Azərbaycanda səfərdə olub, bu il isə Azərbaycan Prezidenti İlham Əliyev Özbəkistana dövlət səfəri həyata keçirib.
Ceyhun Bayramovun sözlərinə görə, səfərin yekunları üzrə iki ölkə arasında 13 sənəd imzalanıb. Bunlar arasında Əbədi dostluq haqqında Müqavilə, Dövlətlərarası Şuranın üçüncü iclasının yekun qərarı və müxtəlif sahələri əhatə edən digər 11 sənəd xüsusi əhəmiyyət daşıyır.
Nazir həmçinin səfər çərçivəsində bir sıra yeni layihələrə start verildiyini və keçirilən Regionlararası Forumun uğurla nəticələndiyini vurğulayıb.
Bayramov bildirib ki, hər bir dövlət səfəri Azərbaycan–Özbəkistan münasibətlərinin inkişafına yeni impuls verir. O, Özbəkistanda baş verən sürətli inkişaf proseslərini də yüksək qiymətləndirib.
XİN rəhbəri əlavə edib ki, Özbəkistanın beynəlxalq platformalardakı nüfuzu da dinamik şəkildə artır.
