İlkinxeber.az informasiya agentliyi xəbər verir ki, Azərbaycan və Özbəkistan arasında həyata keçirilən aviareyslərin sayının həftədə 40-a çatdırılması planlaşdırılır.
Bu barədə Özbəkistanın nəqliyyat naziri İlxom Maxkamov “Özbəkistan 24” telekanalına müsahibəsində bildirib.
Nazirin sözlərinə görə, hazırda iki ölkə arasında həftəlik 18 aviareys həyata keçirilir. Qarşılıqlı uçuşların sayının 40-a qədər artırılması ilə bağlı tapşırıq verilib.
İlxom Maxkamov həmçinin qeyd edib ki, avqustun 23-də Daşkənddə keçirilən yüksək səviyyəli danışıqlar zamanı Azərbaycan və Özbəkistan arasında Orta Dəhlizin infrastrukturunun inkişaf etdirilməsi, birgə müəssisələrin yaradılması və bərə əlaqəsinin bərpası ilə bağlı razılıqlar əldə olunub.
Nazir bildirib ki, razılaşmaların icrası istiqamətində praktiki işlər davam etdiriləcək.
