İlkinxeber.az informasiya agentliyi məlumat verir ki, Rusiyanın İrkutsk vilayətində taun xəstəliyi ilə bağlı yayılan məlumatlar Azərbaycanın Səhiyyə Nazirliyinin Xüsusi Təhlükəli İnfeksiyalara Nəzarət Mərkəzi tərəfindən izlənilir.
Mərkəzdən bildirilib ki, hazırda Azərbaycanda taunla bağlı əlavə məhdudlaşdırıcı tədbirlərin tətbiqinə ehtiyac yoxdur. Epidemioloji vəziyyət daim qiymətləndirilir və zərurət yaranacağı təqdirdə müvafiq tədbirlər operativ şəkildə gücləndirilə bilər.
Qeyd olunub ki, Azərbaycanda son 50 il ərzində taun xəstəliyinə yoluxma halı qeydə alınmayıb. Ölkədə epidemioloji vəziyyət sabitdir və aidiyyəti qurumların nəzarətindədir. Rusiyadan Azərbaycana gələn şəxslərlə bağlı sanitariya-epidemioloji nəzarət tədbirləri qüvvədə olan tələblərə uyğun həyata keçirilir.
Şübhəli hal aşkarlanarsa, xəstədən götürülən nümunələrin laborator müayinəsi Xüsusi Təhlükəli İnfeksiyalara Nəzarət Mərkəzinin laboratoriyasında aparıla bilər. Mərkəz bunun üçün zəruri avadanlıq və ləvazimatlarla təmin olunub.
Mərkəzin fəaliyyət istiqamətlərinə taun və digər xüsusi təhlükəli infeksiyalar üzrə epidemioloji nəzarət də daxildir.
Mütəxəssislərin məlumatına görə, taun əsasən təbii ocaqlı infeksiyadır və törədicisi Yersinia pestis bakteriyasıdır. Xəstəlik əsasən gəmiricilər və birələr arasında yayılır. İnsanlar yoluxmuş heyvan və ya birələrlə təmas, bəzi hallarda isə xəstəliyin ağciyər forması zamanı tənəffüs yolu ilə yoluxa bilərlər.
Taun müalicə olunan xəstəlikdir. Erkən diaqnostika və vaxtında tibbi müdaxilə xəstəliyin müalicəsində mühüm əhəmiyyət daşıyır.
Hazırkı məlumatlara əsasən, Azərbaycanda əhali üçün xüsusi narahatlıq doğuran vəziyyət yoxdur. Vətəndaşlara yalnız rəsmi mənbələrdən yayılan məlumatlara istinad etmək tövsiyə olunur.
