Şimali Kipr Türk Respublikasının Girne şəhəri sahillərində sərnişin gəmisinin batması ilə bağlı axtarış-xilasetmə əməliyyatı davam etdirilir. Hadisə zamanı gəmidə Azərbaycan vətəndaşlarının da olduğu bildirilir.
ilkinxeber.az informasiya agentliyi xəbər verir ki, itkin düşən 20 nəfərin tapılması məqsədilə genişmiqyaslı axtarışlara Türkiyə Hərbi Dəniz Qüvvələrinin “TCG Işın” xilasetmə və dəstək gəmisi də cəlb olunub.
Hazırda Girne sahillərində axtarışlara bir təyyarə, 5 pilotsuz uçuş aparatı, 7 helikopter, 8 gəmi və 9 qayıq cəlb edilib. Əməliyyatlarda Türkiyədən göndərilən SAT komandoları və hərbi dəniz qüvvələrinin dalğıc qrupları da iştirak edir.
Məlumata görə, “TCG Işın” gəmisi bir kilometrədək dərinlikdə axtarış-xilasetmə əməliyyatları həyata keçirmək imkanına malikdir. Gəminin 514 metr dərinlikdə yerləşən qalıqlarına çatmaq üçün xüsusi təzyiqədavamlı geyimlərdən istifadə edən heyət və sualtı robotlardan yararlanılacaq.
Bu əməliyyatın həm itkin sərnişinlərin, həm də gəminin qara qutusunun aşkarlanmasına imkan yaradacağı gözlənilir.
Hadisə avqustun 30-da Girne ilə Türkiyənin Mersin şəhərində yerləşən Taşucu limanı arasında hərəkət edən “Filo Jet” yüksək sürətli sərnişin gəmisində baş verib. Gəmi Girne limanından yola düşdükdən qısa müddət sonra ön hissədən su almağa başlayıb. Limana qayıtmağa çalışan gəmi daha sonra aşıb.
Gəmidə olan Azərbaycan vətəndaşları Valeh Hümmətov və Rəşad İbrahimov xilas ediliblər. Onların gəminin ekipaj üzvləri olduğu və hadisə ilə bağlı istintaq çərçivəsində kapitan və digər ekipaj üzvləri ilə birlikdə saxlanılaraq məhkəməyə çıxarıldıqları bildirilir.
Qəzadan sonra 241 nəfər xilas edilib, 8 nəfərin cəsədi aşkarlanıb. Hazırda 20 nəfərin taleyi barədə məlumat yoxdur.
Gəminin qalıqlarının dənizin təxminən 514 metr dərinliyində olduğu bildirilir. Hadisə ilə bağlı araşdırma davam edir.
