Şuşa şəhərində bəzi turistlərin tarixi əhəmiyyət daşıyan qayaların üzərinə müxtəlif yazılar yazması narazılığa səbəb olub.
ilkinxeber.az informasiya agentliyi xəbər verir ki, Şuşa Şəhəri Dövlət Qoruğu İdarəsinin mətbuat katibi Səmayə Məmmədova məsələ ilə bağlı ictimaiyyətə müraciət edib.
O bildirib ki, şəhərə səfər edən bəzi şəxslər həm təbiətə, həm də tarixi əhəmiyyət daşıyan qayalara zərər vururlar. Mətbuat katibinin sözlərinə görə, bu hallarla bağlı dəfələrlə tədbir görülüb, qayaları korlayan şəxslər cərimələnib və onlara müvafiq izahat verilib.
Lakin görülən tədbirlərə baxmayaraq, bu cür xoşagəlməz hallar hələ də davam edir.
Səmayə Məmmədova qeyd edib ki, həmin qayalarda tariximizin ağır izləri, o cümlədən qan və güllə izləri qorunub saxlanılır. Belə məkanlara müxtəlif yazılar yazılması, adların həkk olunması həmin torpaqlar uğrunda canından keçən insanların xatirəsinə hörmətsizlik kimi qiymətləndirilir.
Qoruq İdarəsi turistləri və şəhərə gələn bütün ziyarətçiləri Şuşanın tarixi və mədəni irsinə hörmətlə yanaşmağa, tarixi abidələrə və təbiətə zərər vura biləcək hərəkətlərdən çəkinməyə çağırıb.
