Goranboy rayonunda anbarda baş verən partlayışlar səbəbilə təxliyə olunan sakinlər evlərinə geri qaytarılıblar.
ilkinxeber.az informasiya agentliyi xəbər verir ki, bu barədə Goranboy Rayon İcra Hakimiyyəti başçısının müavini, Ərazi-təşkilat və ictimai-siyasi məsələlər şöbəsinin müdiri Mirvari Ağamalıyeva məlumat verib.
Onun sözlərinə görə, hadisə ilə əlaqədar rayon icra hakimiyyətində xüsusi komissiya yaradılıb və ərazidə araşdırma aparılıb.
Təhlükəsizlik tədbirləri tam təmin edildikdən sonra təxliyə olunan sakinlərin yaşayış yerlərinə qayıtmasına icazə verilib.
Hazırda hadisənin baş verdiyi ərazidə vəziyyətin stabil olduğu bildirilir.
Qeyd edək ki, sentyabrın 1-də gecə saatlarında Goranboy rayonunda anbarda partlayış baş verib. Hadisə ilə əlaqədar yaxın ərazilərdə yaşayan sakinlər təhlükəsizlik məqsədilə təxliyə edilmişdilər.
