Rəqəmsal səyyahların Azərbaycanda yaşaması ilə bağlı yeni qaydalar

İlkinXəbər.az informasiya agentliyi məlumat verir ki, Azərbaycanda rəqəmsal səyyahların müvəqqəti və daimi yaşamaq icazəsi alması ilə bağlı yeni tələblərin tətbiqi nəzərdə tutulur.
Təklifə əsasən, rəqəmsal səyyahlara Azərbaycan ərazisində müvəqqəti yaşamaq icazəsi ərizədə göstərilən müddətə, lakin 3 ildən çox olmamaq şərtilə veriləcək. Müvafiq əsaslar olduqda bu müddət hər dəfə 3 ildən çox olmayan müddətə uzadıla biləcək.
Əcnəbi və vətəndaşlığı olmayan şəxslərin Azərbaycanda daimi yaşamaq icazəsi əldə etməsi və ya icazənin müddətini uzatması üçün rəqəmsal fəaliyyət göstərdiklərini, həmçinin son 6 ay ərzində xarici mənbələrdən minimum aylıq əməkhaqqının 26 misli məbləğindən az olmayan orta aylıq sabit gəlirə malik olduqlarını təsdiq edən apostil edilmiş və ya leqallaşdırılmış sənədlərin surətini təqdim etmələri tələb olunacaq.
Hazırkı qaydalara əsasən, daimi yaşamaq icazəsi üçün müraciət edən əcnəbilərin hüquq və vəzifələri, eləcə də dövlət dili üzrə bilikləri xüsusi komissiya tərəfindən yoxlanılır. Yeni təklifə görə isə bu tələb rəqəmsal səyyahlara şamil edilməyəcək.
Bundan əlavə, “Sosial sığorta haqqında” Qanuna təklif edilən dəyişikliklə rəqəmsal səyyahların məcburi dövlət sosial sığortası ilə əhatə olunması nəzərdə tutulur.
Təklif qəbul ediləcəyi təqdirdə qanunvericilikdə nəzərdə tutulan dəyişikliklər 2027-ci il yanvarın 1-dən qüvvəyə minəcək.