İlkinxeber.az informasiya agentliyi məlumat verir ki, Milli Məclisdə “Ailə, valideynlik və uşaqların hüquqlarının təminatı haqqında” yeni qanun layihəsinin hazırlanması təklif olunub.
Təkliflə deputat Razi Nurullayev parlamentin bugünkü plenar iclasında çıxış edib.
Deputat bildirib ki, gənc ailələr üçün övlad sahibi olmaq uzunmüddətli məsuliyyətdir və dövlət ailələrə yalnız uşağın doğulduğu vaxt deyil, sonrakı mərhələlərdə də dəstək göstərməlidir.
Onun sözlərinə görə, mövcud sosial dəstək mexanizmləri müxtəlif qanun, proqram və layihələr üzrə ayrı-ayrılıqda tətbiq olunur. Bu isə vətəndaş üçün sistemin bəzən mürəkkəb görünməsinə səbəb olur.
Razi Nurullayev təklif olunan qanunun mövcud dəstək mexanizmlərini vahid hüquqi çərçivədə birləşdirməsini, ailələr üçün xidmətlərin daha əlçatan və aydın olmasını qeyd edib.
Deputat xüsusilə gənc ailələr üçün mənzil imkanlarının genişləndirilməsi, güzəştli ipoteka və ilkin ödənişə dövlət dəstəyi, uşaq baxımı, bağçaların əlçatanlığı, çevik iş imkanları və uşaqların təhsilinə yönələn əlavə dəstək mexanizmlərinin nəzərdən keçirilməsini təklif edib.
