İlkinxeber.az informasiya agentliyi məlumat verir ki, kənd təsərrüfatı sahəsində fermerlər üçün yeni dövlət dəstək mexanizmləri tətbiq ediləcək.
Kənd təsərrüfatı naziri Məcnun Məmmədov bildirib ki, müasir suvarma sistemlərindən istifadə edən və ixtisaslaşmış rayonlarda fəaliyyət göstərən fermerlərə hektar üzrə daha yüksək subsidiya ödəniləcək.
Nazirin sözlərinə görə, müasir suvarma altında olan sahələr üçün subsidiya 400 manata qədər artırılacaq. İxtisaslaşmış rayonlarda ərzaqlıq buğda istehsalçılarına isə tonuna 50-100 manat əlavə subsidiya veriləcək.
Bağçılıq sahəsində də yeni dəstək mexanizmləri nəzərdə tutulub. Azad olunmuş ərazilərdə və Naxçıvanda müxtəlif meyvə növlərinin əkilməsi üçün hektara 2-3 min manatdan başlayaraq 20 min manatadək birdəfəlik subsidiya verilə biləcək.
Bundan əlavə, kənd təsərrüfatı texnikası, müasir suvarma sistemləri, qoşqular, silolar və istixanalar üçün güzəştlərin artırılması planlaşdırılır.
Yeni investisiya qoyan fermerlərə isə yaradılan fermalarda hər heyvan üçün südçülük təsərrüfatlarında 1500 manat, ətçilik təsərrüfatlarında isə 1000 manat əlavə subsidiya verilməsi nəzərdə tutulur.
