Türkiyəli jurnalist Celal Çiftçi Azərbaycanla bağlı mübahisələrə səbəb olan fikirlərinə görə üzrxahlıq edib. O, Azərbaycan dövlətinə və xalqına müraciət edərək sözlərinin yaratdığı narazılığa görə təəssüfləndiyini bildirib.
ilkinxeber.az informasiya agentliyi Oxu.Az-a istinadən xəbər verir ki, “Şanlıurfa Olay” qəzetinin köşə yazarı üzrxahlığını “X” sosial şəbəkəsində yayımlayıb.
Çiftçi paylaşımında bildirib ki, hicab, din və vicdan azadlığı ilə bağlı düşüncələrini ifadə etmək istəyərkən seçdiyi ifadələrin doğura biləcəyi nəticələri lazımi səviyyədə nəzərə almayıb. O, fikirlərini çatdırma formasının məqsədindən kənara çıxdığını qəbul edib.
Jurnalist Azərbaycan dövlətinə qarşı çıxmaq, cəmiyyətdə qarşıdurma yaratmaq və ya ölkədə hakimiyyətin zorla dəyişdirilməsinə çağırmaq niyyətinin olmadığını vurğulayıb. O, dini zəmində nifrət və düşmənçilik yaratmaq, insanları qanunsuz fəaliyyətə yönəltmək məqsədi güdmədiyini də qeyd edib.
Çiftçi Azərbaycanın dövlət müstəqilliyinə, suverenliyinə və ərazi bütövlüyünə hörmət etdiyini açıqlayıb. Onun sözlərinə görə, ölkənin gələcəyi ilə bağlı qərarlar Azərbaycan xalqının və dövlətin konstitusion institutlarının səlahiyyətindədir.
Hicab məsələsinə toxunan jurnalist həm başını örtən, həm də örtməyən insanların seçimlərinə və hüquqlarına hörmətlə yanaşdığını bildirib. O, bu mövzuda müzakirələrin qarşılıqlı hörmət və dinc dialoq əsasında aparılmasının vacibliyini qeyd edib.
Çiftçi söz və mətbuat azadlığının məsuliyyət tələb etdiyini də etiraf edib. O, mübahisəyə səbəb olan və uyğun hesab etmədiyi paylaşımları sildiyini, bundan sonra ifadələrini seçərkən daha diqqətli olacağını bildirib.
Jurnalist Azərbaycanla Türkiyə arasındakı münasibətlərə zərər vurmaq istəmədiyini vurğulayaraq, yaranmış incikliyə görə peşman olduğunu ifadə edib.
O, müraciətində Azərbaycan dövlətindən və xalqından üzrünün qəbul olunmasını xahiş edib.
Celal Çiftçi paylaşımının sonunda “İki dövlət, bir millət” ifadəsini işlədərək iki ölkə arasındakı qardaşlıq münasibətlərinə münasibətini bildirib.
