İlkinxeber.az informasiya agentliyi məlumat verir ki, İpoteka və Kredit Zəmanət Fondu tərəfindən vətəndaşların mənzil şəraitinin yaxşılaşdırılması məqsədilə satmaq öhdəliyi ilə kirayə mənzil mexanizminin tətbiqi davam etdirilir.
Fondun məlumatına görə, 2020–2026-cı illərdə Bakı və Sumqayıt şəhərlərində, eləcə də Abşeron rayonunda yerləşən yaşayış komplekslərində vətəndaşlara tam təmirli mənzillər təqdim olunub. İndiyədək bu mexanizm çərçivəsində 10 mindən çox kirayə müqaviləsi rəsmiləşdirilib.
2026-cı il oktyabrın 1-dən etibarən qaydalara bir sıra dəyişikliklər edilib.
Dəyişikliklərə əsasən, satmaq öhdəliyi ilə kirayə mənzil əldə edən şəxs müqavilə bağlandıqdan 3 il sonra öz öhdəliyini başqa şəxsə ötürə biləcək. Öhdəliyini ötürən şəxslər isə bu mexanizmdən yenidən yalnız 5 il keçdikdən sonra yararlana biləcəklər.
Bundan əlavə, müraciət zamanı İpoteka və Kredit Zəmanət Fondunun vəsaiti hesabına verilmiş aktiv ipoteka krediti olmayan borcalanlar da kirayə mənzil mexanizminə müraciət edə biləcəklər.
Yeni qaydalara əsasən, ərizəçilərin kredit tarixçəsinə dair tələblər də yenilənib. Belə ki, qiymətləndirmənin nəticəsinə uyğun olaraq, yalnız müsbət və qənaətbəxş kredit tarixçəsinə malik şəxslər bu imkandan yararlana biləcəklər.
Fond dəyişikliklərlə bağlı əlavə məlumat almaq istəyən vətəndaşları 1549 Çağrı Mərkəzinə müraciət etməyə dəvət edib.
