İlkinxeber.az informasiya agentliyi məlumat verir ki, Bakının Sabunçu rayonunda 2 yaşlı uşağın ölümü ilə bağlı yeni təfərrüatlar açıqlanıb.
Məlumata görə, uşağın əmisi Teymur Əliyev “Teleqraf”a bildirib ki, azyaşlının valideynləri boşanıb və uşaq anası ilə yaşayıb. Onun 9 yaşlı bacısı isə atası ilə qalırmış.
Teymur Əliyevin sözlərinə görə, işləyən ana övladını aylıq 250 manat ödəniş qarşılığında dayəyə tapşırıb. Həmin qadın bu uşaqla yanaşı, daha dörd uşağa da baxırmış.
O, hadisədən əvvəl də uşağın üzündə xəsarət izlərinin olduğunu iddia edib. Əmisinin bildirdiyinə görə, ötən həftə dayə uşağın yıxıldığını deyərək anasına onun üzündəki xəsarətlərin fotosunu göndərib.
Teymur Əliyev morqda uşağın üzündəki izlərin qaraldığını gördüyünü, son hadisə zamanı isə azyaşlının başından xəsarət aldığını və beyninə qan sızdığını bildirib.
Onun sözlərinə görə, hadisədən sonra dayənin qayınanası uşağı xəstəxanaya aparıb. Daha sonra dayə və ailə üzvləri yaşadıqları kirayə evdən çıxıblar. Hazırda hüquq-mühafizə orqanlarının onların axtarışını apardığı bildirilir.
Hadisənin ilkin təfərrüatları
Hadisə Bakının Sabunçu rayonunun Anaşkin küçəsində baş verib. İlkin məlumatlara görə, 2024-cü il təvəllüdlü A. İsmayılovun anası mağazaya gedərkən uşağı müvəqqəti olaraq qonşusuna tapşırıb. Geri qayıtdıqda övladının pilləkəndən yıxılaraq öldüyünü görüb.
Hadisədən sonra uşağın anası ilə qonşusu arasında mübahisə yaranıb və əlbəyaxa dava baş verib. Hadisə zamanı uşağın atasının işdə olduğu bildirilir.
Azyaşlının ölümünün hansı şəraitdə baş verdiyi və səbəbləri araşdırılır. Uşağın əmisinin səsləndirdiyi iddiaların hüquq-mühafizə orqanları tərəfindən təsdiqlənib-təsdiqlənmədiyi barədə isə məlumat verilməyib.
