İranın elm, tədqiqat və texnologiya naziri Hüseyn Simayi-Sərrafın Azərbaycanda təhsil məsələləri ilə bağlı səsləndirdiyi fikirlər Azərbaycan Elm və Təhsil Nazirliyinin narazılığına səbəb olub.
İlkinxeber.az informasiya agentliyi məlumat verir ki, Elm və Təhsil Nazirliyinin açıqlamasında İran rəsmisinin fikirləri yersiz hesab edilib və Azərbaycanın daxili işlərinə müdaxilə cəhdi kimi qiymətləndirilib.
Bildirilib ki, Azərbaycanın təhsil siyasəti də daxil olmaqla, daxili işlərinə kənar müdaxilələrə yol verilmir və bu cür cəhdlərin qarşısı qətiyyətlə alınır. Nazirlik İran rəsmilərini başqa ölkələrin daxili məsələlərinə müdaxilə etmək əvəzinə, öz ölkələrindəki problemlərə diqqət yetirməyə çağırıb.
Açıqlamada İranda Azərbaycan dilində təhsil məsələsinə də toxunulub. Qeyd edilib ki, ölkədə Azərbaycan dilində tədris aparılan məktəb yoxdur, ali təhsil müəssisələrində də bu dildə təhsil həyata keçirilmir.
Nazirlik vurğulayıb ki, İran əhalisinin təxminən 40 milyonunu etnik azərbaycanlılar təşkil edir və onlar uzun illərdir ana dilində təhsil almaq hüququndan məhrumdurlar.
Bildirilib ki, İran rəsmiləri Azərbaycanın daxili işlərinə müdaxilə etmək əvəzinə, öz ölkələrində Azərbaycan dilində təhsil hüququ ilə bağlı mövcud problemlərin həlli istiqamətində addımlar atmalıdırlar.
