Azərbaycanın turizm imkanları Pakistanda təqdim olunub

İlkinxeber.az informasiya agentliyi məlumat verir ki, Azərbaycanın turizm imkanları Pakistanın Lahor, Karaçi və İslamabad şəhərlərində keçirilən silsilə tədbirlər çərçivəsində təqdim olunub.
15-19 sentyabr tarixlərində keçirilən tədbirlər Azərbaycan Turizm Bürosu (ATB) tərəfindən təşkil edilib. Tədbirlərdə “Azərbaycan Hava Yolları” QSC (AZAL), Azərbaycanın üç yerli turizm sənayesi nümayəndəsi, həmçinin Pakistanın “Pakistan International Airlines” (PIA) və “Airblue” aviaşirkətləri iştirak edib.
Görüşlərə Pakistan turizm sektorunun 360-dan çox nümayəndəsi qatılıb.
Təqdimatlar zamanı Azərbaycanın tarixi və mədəni irsi, qış turizmi, dağ-xizək mərkəzləri, sağlamlıq və ekoturizm imkanları barədə məlumat verilib.
Həmçinin Şuşa şəhərinin 2026-cı il üçün İqtisadi Əməkdaşlıq Təşkilatının Turizm Paytaxtı elan edilməsi ilə bağlı təqdimat keçirilib.
Azərbaycan və Pakistan turizm sənayesi nümayəndələri arasında keçirilən işgüzar görüşlərdə iki ölkənin turizm sektorları arasında əməkdaşlıq və tərəfdaşlıq imkanları müzakirə olunub.