Gürcüstanda Azərbaycan vətəndaşı olan gənc qızın qətlə yetirilməsi ilə bağlı məlumat yayılıb. İlkinxeber.az informasiya agentliyi xəbər verir ki, hadisə barədə məlumatı “Sapari” təşkilatının rəhbəri Baia Pataraia sosial şəbəkə hesabında yayıb. Onun sözlərinə görə, gənc qızla iki gün ərzində əlaqə saxlamaq mümkün olmayıb. Bundan sonra hüquq-mühafizə orqanlarının əməkdaşları mənzilin qapısını sındıraraq içəri daxil olub və qızın meyitini aşkar ediblər.
Baia Pataraia qeyd edib ki, hadisəni törədən şəxs Türkiyəyə qaçıb və hazırda onun axtarışı davam etdirilir.
Məlumata görə, gənc qız sevgilisinin vədlərinə inanaraq Gürcüstana gəlib. Ona burada birlikdə yaşamaq və işləmək təklif edilib. Lakin vədlər özünü doğrultmayıb, maddi sıxıntılar yaranıb. Bildirilir ki, həmin şəxs qızın telefonunu lombarda qoyub, onu döyərək küçəyə atıb və daha sonra ölkəni tərk edib.
Çarəsiz vəziyyətdə qalan qıza yerli bir qadın kömək edib və onun yaxınları ilə əlaqə yaratmasına şərait yaradılıb. Daha sonra qızın bir qohumu Gürcüstana gələrək onun üçün kirayə mənzil tutub. Lakin bir müddət sonra qız itkin düşüb.
Qızın bacısının müraciətindən sonra mənzilə baxış keçirilib. Qonşuların sözlərinə görə, hadisədən bir gün əvvəl mənzildən dava-dalaş səsləri eşidilib. Polis əməkdaşları mənzilə daxil olduqdan sonra qızın cəsədini aşkar ediblər.
Hazırda faktla bağlı araşdırma aparılır. Hadisənin bir neçə ölkəni əhatə etməsi səbəbindən məsələnin hüquqi tərəflərinin də araşdırılması zəruri hesab olunur.
