İlham Əliyev Niderlandın xarici işlər naziri ilə görüşüb

Azərbaycan Prezidenti İlham Əliyev oktyabrın 26-da Niderland Krallığının xarici işlər naziri Tom Berendseni qəbul edib.
İlkinxeber.az informasiya agentliyi məlumat verir ki, görüşdə Azərbaycan ilə Niderland arasında siyasi, diplomatik, iqtisadi və investisiya sahələrində əməkdaşlığın inkişaf perspektivləri müzakirə olunub.
Dövlət başçısı ötən il Kopenhagendə Niderlandın sabiq Baş naziri Dik Sxofla keçirdiyi görüşü xatırladaraq, həmin vaxt iki ölkə arasında əməkdaşlığın gələcək imkanlarının müzakirə edildiyini bildirib. Prezident Tom Berendsenin Azərbaycana səfərinin ikitərəfli əlaqələrin genişləndirilməsi baxımından əhəmiyyətini vurğulayıb.
Niderlandın xarici işlər naziri qəbul üçün təşəkkürünü bildirərək, ölkəsinin Azərbaycanla əməkdaşlığın inkişafında maraqlı olduğunu qeyd edib.
Tom Berendsen Yaxın Şərqdə baş verən hadisələr zamanı Niderland vətəndaşlarının, o cümlədən ölkəsinin Tehrandakı səfirinin və səfirlik əməkdaşlarının Azərbaycan vasitəsilə təxliyəsinə göstərilən dəstəyə görə minnətdarlığını ifadə edib.
O, həmçinin Cənubi Qafqazda sülh və sabitliyin təmin olunmasında Prezident İlham Əliyevin şəxsi rolunu yüksək qiymətləndirərək, bu məsələnin Avropa üçün də böyük əhəmiyyət daşıdığını bildirib.
Görüşdə iqtisadi-ticari əlaqələrin genişləndirilməsi, qarşılıqlı səfərlərin və işgüzar nümayəndə heyətlərinin görüşlərinin təşkili məsələləri də diqqət mərkəzində olub.
Tərəflər nəqliyyat, logistika, Bakı Beynəlxalq Dəniz Ticarət Limanı və kənd təsərrüfatı sahələrində əməkdaşlığın genişləndirilməsi imkanlarını müzakirə ediblər.
Azərbaycanın kənd təsərrüfatının inkişafına xüsusi önəm verdiyi və bu sahədə genişmiqyaslı dövlət proqramlarının həyata keçirildiyi vurğulanıb. Niderlandın kənd təsərrüfatı sahəsində qabaqcıl təcrübəsi nəzərə alınaraq, bu istiqamətdə qarşılıqlı əməkdaşlığın inkişafı üçün geniş imkanların olduğu bildirilib.