İşğaldan azad edilmiş Ağdərə rayonunun Çardaqlı kəndi ərazisində mina hadisəsi baş verib.
ilkinxeber.az informasiya agentliyinin əldə etdiyi məlumata görə, humanitar minatəmizləmə işlərinə cəlb olunan qeyri-hökumət təşkilatının əməkdaşı, 1994-cü il təvəllüdlü Surxaylı Əlzamin Vəzir oğlu xidməti vəzifəsini yerinə yetirərkən piyada əleyhinə minaya düşüb. Partlayış nəticəsində o, sağ ayaq nahiyəsindən xəsarət alıb.
Hadisə zamanı digər əməkdaş, 1998-ci il təvəllüdlü Füzuli Rizvan oğlu Mirzəyev isə yüngül bədən xəsarətləri alıb.
Yaralılar dərhal Ağdərə Rayon Mərkəzi Xəstəxanasına çatdırılıblar. Onlara zəruri tibbi yardım göstərilib. Məlumata görə, hər iki şəxsin vəziyyəti qənaətbəxşdir.
Faktla bağlı aidiyyəti qurumlar tərəfindən araşdırma aparılır.
