İlkinxeber.az informasiya agentliyi məlumat verir ki, Gəncədə restoranda baş verən qətl hadisəsi ilə bağlı daha 7 nəfər saxlanılaraq inzibati qaydada həbs edilib.
Məlumata görə, həmin şəxslər hadisə zamanı restoranda olublar və xuliqanlıq hərəkətlərinə yol veriblər. Hadisədən dərhal sonra hüquq-mühafizə orqanlarının əməkdaşları “Günəş” restoranına gəliblər.
Qətlin şahidi olan şəxslər polis əməkdaşları tərəfindən ifadə vermək üçün prokurorluğa dəvət olunublar. Lakin onların üzrlü səbəb olmadan ifadə verməkdən imtina etdiyi və polisin qanuni tələbinə tabe olmadığı bildirilib.
Bundan sonra restoranda ad günü qeyd edən 24 yaşlı şəxs və onunla birlikdə olan 26, 23, 31, 21 və iki 28 yaşlı dostu saxlanılıb. Onların barəsində müvafiq protokollar tərtib olunub.
Saxlanılan şəxslər hadisə zamanı sərxoş olduqlarını bildiriblər və törətdikləri əməldən peşman olduqlarını deyərək yüngül cəza istəyiblər.
Məhkəmənin qərarı ilə 24 yaşlı şəxs 25 gün, onun 23 yaşlı dostu 5 gün, digər 5 nəfərin hər biri isə 15 gün müddətinə inzibati qaydada həbs edilib.
Qeyd edək ki, hadisə avqustun 6-da Gəncə şəhəri Z. Hacıyev küçəsində yerləşən “Günəş” restoranında baş verib. İlkin məlumata əsasən, ad günü məclisinə toplaşan şəxslərlə yan otaqda olan şəxslər arasında mübahisə yaranıb.
Mübahisə zamanı 43 yaşlı Asif Yusifov bıçaq xəsarətləri alaraq həyatını itirib. Cinayəti törətməkdə şübhəli bilinən 20 yaşlı M. Məmmədzadə polis əməkdaşları tərəfindən saxlanılıb.
Hadisə ilə bağlı araşdırma davam etdirilir.
