İlkinxeber.az informasiya agentliyi məlumat verir ki, Samux rayonunun Alıuşağı kəndində ət məhsulundan zəhərlənmə ehtimalı ilə xəstəxanaya müraciət edənlərin sayı 10 nəfərə çatıb.
Məlumata görə, daha 5 nəfər – 2001-ci il təvəllüdlü Nuranə Vəliyeva, 1977-ci il təvəllüdlü Günay Əliyeva, 1986-cı il təvəllüdlü Nargilə Babayeva, 1974-cü il təvəllüdlü Tünzalə Cabbarova və 1984-cü il təvəllüdlü Şəmil Hacıyev Abbas Səhhət adına Gəncə Şəhər Birləşmiş Xəstəxanasının Yoluxucu xəstəliklər şöbəsinə yerləşdirilib.
Daha əvvəl isə Alıuşağı kəndinin 5 sakini – Məlahət Allahverdiyeva, Azər Allahverdiyev, Seymur Əliyev, Elçin Cabbarov və Mehriban Orucova eyni şöbədə müalicəyə cəlb olunmuşdu.
İlkin müayinələr zamanı xəstələrdə qarayara xəstəliyinin əlamətləri müəyyən edilib. Hazırda onların müalicəsi davam etdirilir.
Azərbaycan Qida Təhlükəsizliyi Agentliyindən bildirilib ki, hadisə nəzarətdə saxlanılır. Hadisənin səbəblərinin, eləcə də bunun qida zəhərlənməsi olub-olmadığının müəyyənləşdirilməsi üçün müvafiq qurumlarla birgə araşdırma aparılır.
Araşdırmanın nəticələri barədə ictimaiyyətə əlavə məlumat veriləcək.
